[pap] Educacion, cultura y meditacion, hermentnan pa logra exito den bida

TEDxAruba 2016, a surpasa tur espectativa!

TEDx Aruba 2016 a resulta un exito grandi, specialmente si tende e comentarionan di esnan cu a presencia e evento importante aki y cu tambe a wordo sigui via internet na varios parti rond mundo. E evento TED, conoci rond mundo, na Aruba a wordo parti den tres sesion y a conta cu participacion di 9 orador local y internacional den e sala principal di Cas di Cultura.

TEDx Aruba 2016, ta e di dos edicion di TEDx cu a wordo organisa na Aruba. Prome Minister Mike Eman a participa como orador na TEDx Binnenhof, na Den Haag na 2014 y a resulta den un exito rotundo. Despues di e experiencia ey, riba su sugerencia, a cuminsa e trabounan pa mira si por a trece un evento asina Aruba. Organisadonan di TEDx a resulta di tabata sumamente interesa den Aruba.

TEDx Aruba 2016 a tuma luga diabierna ultimo y e publico a disfruta for di oranan di mainta caba di algun orador excelente. Entre otro di e hoben orguyo Arubiano Sarah-Quita Offringa, Arthur Woods cu a papia di e ‘super power ‘ tur hende tin y e dama di “zero waste” Andrea Sanders. Despues a sigui cu oradorna cu a enfoka riba innovacion.

Maurice de Hond sigur a captiva cu su discurso titula “What if we educate our children for the future and not the past?” De Hond a papia di e generacion di su mayornan di cual un gran mayoria no a finalisa scol. E mes tabata un di e promenan den su famia pa studia y gradua na Universidad, mescos cu su yiunan mas grandi. Sinembargo el a sinti e necesidad grandi pa propone un cambio den e sistema educativo na momento cu el a realisa cu su yiu di mas chikito, cu a nace na 2009, mester bay e mesun scol cu su yiunan mas grandi a bay 37 aña pasa. “Mundo a cambia hopi e ultimo 20 añanan. E generacion di awe ta un otro tipo cu e generacion prome cu nos. Mi mester prepara mi yiu pa futuro y no pa pasado,” de Hond a splica e publico.

Basa riba e pensamento ey a diseña un concepto di educacion nobo, unda cu e muchanan ta wordo educa basa riba nan nivel y loke nan ta gusta, nan habilidad. Esaki ta haci cu nan ta studia cu mas gana, na ora y e dianan cu nan kier, y cu mas exito. Ya caba tin 8 mil di e scolnan aki rond mundo y Aruba un biaha mas lo cana dilanti den region, ora cu na September, 2017 cuminsa cu 5 di e tipo di e scolnan aki na Aruba.

E orador local Indra Zaandam a lanta hopi emocion, papiando cu orguyo di Aruba y su cultura. Mescos cu ne, e ta sinti, tin hopi hoben y adulto cu tin hamber pa siña mas di “nos cultura”. Y asina tin hopi hende den nos comunidad cu ta e “rockstarnan” of e heroenan di informacion cultural, y a menciona entre otro Ramon Todd Dandare y Des Croes (di BNA). “Mi ta hopi orguyoso di Aruba y no tin nada di “Islas Inutiles” manera el a wordo yama den pasado. Nos tin hopi cos y hopi experto. No tin nada pa kibra nos. Ta increibel con nos ta crece den un mundo asina compleho.”

Den un forma hopi emocional el a finalisa su discurso recordando un mentor di dje tempo cu el a traha na Parke Arikok, Agapito Gomes kende a fayece diaranson ultimo. “Cu fayecimento di Agapito hopi informacion a bay sin cu e por a wordo comparti. E ‘peptalk’ aki ta pabo Agapito,” el a finalisa bisando.

E ultimo orador tabata Susan Piver, un persona kende nunca a caba su scol, a traha como waiter, bartender y taxista. Pero awe, danki na su lucha den bida, ta un “bestseller author” di 9 buki. “Esaki despues di un periodo largo cu mi a sintimi perdi. Pero danki na meditacion mi a supera e momentonan di duda y a publica mi prome buki (Preguntanan cu mester haci prome cu casamento) cual a bira un bestseller instantaneamente. Con el a logra yega asina leu? Na momento cu e tabata perdi, el a topa cu su maestro kende a introduci’e den meditacion. “El a siñami sinta keto y scucha mi rosea. Ora cu mi a logra haci esaki pa un ora largo, mi a cuminsa scucha mi pensamentonan, sinti y mira e magia di e cosnan bunita di bida. Despues di esaki mi a skirbi mi prome buki,” el a bisa su publico.

E atardi a finalisa cu e presentacion di canta-autor Levi Silvanie, acompaña pa guitarista Sergio Jansen, cu su famoso cancion “Djis mi mes”.

Recommended Posts