[pap] Aruba ta haya un Mobile Tech Lab pa pasa na scolnan

Anuncio haci durante TEDx Aruba 2016

ORANJESTAD – TEDx Aruba 2016 a inicia den un forma tremendamente positivo ora cu, ademas di anuncia e premio BIC di OCTA Innovation cu TEDx Aruba 2015 a gana, tambe a keda informa for di Brussels cu e organisacion di Overseas Countries and Territories ta bay facilita e fondonan pa un Laboratorio Tecnologico Mobil pa Aruba. E obhetivo ta pa hiba e ‘Mobile Tech Lab’ aki na diferente scolnan secundario; similar na loke e Bibliobus ta conoci p’e na scolnan basico. Di e manera aki ta expone hobennan un poco mas na e topico di tecnologia y innovacion.

Inmediatamente despues di e anuncio, durante TEDx Aruba 2016, ingeniero Kock  a duna un presentacion caminda a duna varios detaye importante di e proyecto cu ta inicia dentro de poco. E proyecto ta encera e transformacion di un container di carga den un ‘Mobile Technology Lab’, cu lo conta cu 3D printers, laser cutters, iPads, computer y paketenan pa siña muchanan mas di electronica y e ultimo tecnologia ey ‘fo.

Na cuminsamento di aña, Bureau Innovatie a entrega un peticion na OCTA Innovation, un sub division di e Association of the Overseas Countries and Territories di Union Europeo, pa financiamento di un Mobile Tech Lab. E ta un posibilidad cu ta existi pa islanan den Union Europeo. Na Augustus OCTA Innovation a informa cu e peticion a wordo acepta y cu e Mobile Tech Lab lo bira un realidad na Aruba.

E proyecto di Mobile Tech Lab ta conecta na e programa nacional di Traimerdia/Nos Atardi cu ta brinda muchanan actividadnan positivo despues di scol. E plan ta pa pone e Tech Lab na cada pa un periodo di 2 siman caminda lo expone studiantenan den e programa na tecnologia nobo y yuda nan e capacidadnan practico cu nan mester tin pa enfrenta e retonan den futuro. Despues di 2 siman, e Tech Lab lo move pa un otro localidad di Traimerdia/Nos Atardi pa asina yega den contacto cu mas studiante. Inicialmente e Tech Lab lo move rond pa un periodo di un aña y mey.

Durante e 2 siman menciona, studiantenan ta haci diferente tarea practico. A skirbi un curriculum pa muchanan mas hoben (entre 6 y 12 aña) y un otro pa studiantenan mas grandi (12-16 aña). Studiantenan lo siña traha cu e 3D printers y print cosnan funcional cu nan por hiba cas mesora. Tambe ta bay siña traha cu laser-cutters, por ehempel, nan lo por ‘grafeer’ nan nomber riba un pida palo recicla of cover di nan telefon. Studiantenan cu ta mas grandi por siña programa computer y haya tareanan cu un dificultad un tiki mas halto. En total, studiantenan lo tin hopi interaccion practico y divertido cu e Tech Lab durante 2 siman.

E meta di e Tech Lab ta pa: 1) Expone hobennan na tecnologia nobo, riba un manera practico y recreacional, 2) Siña hobennan con pa traha cu e tecnologianan aki pa asina nan por domina esaki den futuro; 3) Siña hobennan e capacidadnan di ‘critical thinking’ y ‘problem solving,’ 4) Siña den practica loke hopi biaha ta wordo siña solamente den teoria na scol, 5) Siña hobennan traha hunto pa resolve problema; algo cu ta crucial pa futuro y 6) Siña hobennan comunica cu otro, expresa nan mes.

Na final loke Bureau Innovatie, un departamento di e Ministerio di Asuntonan General, Innovacion, Ciencia y Desaroyo Duradero bou direccion di Minister President Mike Eman, kier logra ta pa hisa e conocemento cientifico mey mey di nos hobennan. Creando un generacion di studiantenan cu un miho comprension di ciencia y tecnologia y cu ta ekipa cu e capacidadnan neccesario pa afronta e cambionan den tecnologia den futuro.

“Si esaki bira un realidad, nos ta premira cu studiantenan lo presta miho na scol, specialmente den e temanan ‘scheikunde, natuurkunde y wiskunde’. Principalmente door di e manera practico cu nan lo siña esaki den e Tech Lab,” asina Kock a splica.

Den e simannan venidero, segun cu e proceso oficial di e otorgamento ta wordo finaliza, Bureau Innovatie lo comunica mas di e Tech Lab via un website unda hende por lesa tur informacion di un manera masha transparente. Tambe ta bay continua aserca diferente partners pa asina, hunto, haci e proyecto aki un joya sostenibel pa Aruba.

1 2 img_2016

Recommended Posts