[pap] TEDx su evento “What if…” a revoluciona un diabierna na Aruba

Nuebe orador a captiva un sala yen na Cas di Cultura

“What If” tabata e tema di e evento TEDx Aruba 2016 cual a tuma luga diabierna den Cas di Cultura. Un mainta cu a cuminsa cu discurso di Prome Minister Mike Eman, kende a logra cu TEDx por a bin Aruba aña pasa pa prome biaha despues di su participacion na TEDxBinnenhof 2014.

Den e prome sesion di tres orador tabatin Sarah-Quita Offringa cu su discurso ‘What if it takes a village to make a Sarah-Quita’; Arthur Woods ‘What if we all had superpowers’ y Andrea Sanders ‘What if we refuse trash’.

Tur e oradornan aki tabatin algo en comun. Un storia cu ta inspira otro, cual ta e mision tambe di un evento manera TEDx. Sarah-Quita tabatin un bunita storia cu a cuminsa na e “village” Aruba, cu un soño pa competi cu e “grandinan” di windsurfing ora cu e tabatin apenas 12 aña. Su soño a wordo logra danki na e apoyo cu semper e tabatin di su mayornan. Ora cu el a bay studia na Hulanda e realidad di bida a dal’e: un bida riba su mes, sin ningun hende pa regla su asuntonan p’e. El a cay pero a siña cu semper tin hende toch cu ta dispuesto pa saca un man den e bida druk cu e tabatin entre su estudio y competencianan. Algo importante cu el a siña tabata maneha su tempo pa regla su bida entre estudio y competencia na e diferente “village”nan di mundo, cu for di cada uno a el a siña algo di bida.

Tur cos cu bo haci den bida tin un motibo y por yuda otronan pa mehora. Asina Arthur Woods a experencia despues cu el a finalisa su estudio y a drenta e mercado laboral hopi inspira pa logra cosnan den bida. “Nan ta siñabo den bida cu bo tin cu studia y despues bira profesionalnan inspira. Pero inspiracion ta un cos y e mundo ey ‘fo ta algo otro.” El a haya su mes ta pone mas atencion na loke otronan a bis’e enbes di haci loke e kier logra. Su concepto den bida a cambia despues cu el a bay traha cu Google y a cuminsa dedica parti di su tempo liber na Youtube, den e tempo cu e canal aki tabata practicamente solamente di temanan simpel. “Ta increibel con hopi diferencia 5 ora di trabou boluntario riba YouTube a haci pa revoluciona loke por a haya riba e canal aki,” Woods a bisa e sala di Cas di Cultura cu tabata completamente yen.  Aki el a siña cu e miho trabou cu bo por haci ta esun cu bo ta gusta y cu bo ta sinti cu bo ta haci algo pa yuda otronan.”

Tur e oradornan di mainta tabatin un mensahe hopi positivo cu a wordo treci dilanti den e 15 minuut cu nan tabatin disponibel pa haci nan presentacion. E oradornan a referi na diferente ocasion cu loke nan ta trece dilanti ta cuadra cu e concepto di sostenibilidad cu Prome Minister Eman a trece dilanti den su discurso na apertura di e conferencia.

Hopi atencion tabatin pa Andrea Sanders kende ta biba cu practicamente “zero waste” y esaki ta danki na e forma con el a wordo lanta. “Mi a wordo inspira pa mi welonan,” el a bisa. Pesey e tabata facil pa adapta su mes na un estilo di bida unda cu practicamente no tin desperdicio. El a mustra cu tabata facil p’e adapta su mes mirando e ambiente den cual el a lanta y e ta trata di educa otronan pa nan tambe logra yega na un mundo cu practicamente ningun desperdicio.

Hopi loke nos ta usa awendia ta diseña pa usa un biaha y tira afo, basa riba un mercadeo dirigi riba esaki. Cada un por traha pa trece cambio den esaki, pero na mesun momento el a bisa cu reciclahe no ta e solucion completo. “Nos ta produci demasiado pa cumpli cu e meta di reciclahe.” El a duna e ehempel cu e ta cana cu su container pa bebe likido y un tayo chikito den cua e por pone su cuminda tambe den dje ora cu ta necesario.

Tin algun conseho basico, el a trece dilanti, cu por sigui pa yega na practicamente “zero waste”. Ora cu yega na esaki por papia di un “zero waist economy”, esey ta nifica fabrica y uza material sin causa sushi. Por cuminsa na reduci “waste”, cual ta algo cu tur hende por logra. Pa Aruba e ta un poco dificil unda cu mas cu 90 porciento di loke ta wordo uza ta importa. Pero mester tin un comienso y mester simplifica e ambiente, unda cu ta balora “propiedad” (loke bo ta uza) enbes di concentra riba consumismo. “Enfoca riba productonan duradero,” Sanders a bisa, “cuminsa pa cambia di “disposable life style” pa un “re-use lifestyle”. Pa cada cos cu bo uza na cas, mira kico bo por re-uza. Na restaurant cuminsa pa pidi bebida sin straw, semper cana cu un container chikito pa hiba bo resto di cuminda. Asina bo ta conscientisa otronan. Principalmente na hotelnan, unda por conscientisa e turistanan cu di e forma aki por proteha e turtuganan tambe”.

Recommended Posts