[pap] TEDx Aruba a gana premio BIC (Business, Innovation and Creativity) di OCTA

Programa di TEDx Aruba 2016 a inicia den un forma hopi positivo ora cu ekipo organisado, audiencia y tambe Prome Minister Mike Eman a keda sorprendi pa e anuncio, en bibo y for di Brussels, cu TEDx Aruba a bira merecedo di un premio internacional.

Ta trata di BIC (Business, Innovation and Creativity) Award otorga pa OCTA Innovation, un subdivision di e Association of the Overseas Countries and Territories di Union Europeo. Na opinion di OCTA Innovation, TEDx Aruba ta un di e miho ehempelnan di con innovacion por florece riba un isla chikito.

E fundacion TEDx Aruba a nace basa riba e vision di Gobierno pa sostenibilidad y desaroyo di industria di conocemento. Nan tabata na altura caba di un nominacion pa e premio aki, sin embargo no tabata sa cu OCTA lo tuma e evento anual como ocasion pa haci e anuncio. Anuncionan di tur premio mes ta programa pa tuma luga durante e 21C International Innovation Conference na november proximo.

E premio ta parti di un programa di sosten pa innovacion. OCTA ta identifica Comercio, Innovacion y Creatividad como e pilarnan pa crecemento sostenibel di su miembronan. Pa medio di e premio kier resalta e proyecto y iniciativanan cu ta promove e areanan aki.

TEDx Aruba ta promove innovacion sostenibel, creacion di negoshinan nobo y haci ideanan realidad, no solamente pa Aruba, pero tambe pa otro economianan chikito similar, specialmente di SIDS (Small Islands Developing States). E mision di TEDx Aruba ta pa propaga idea y accionnan innovativo.

Director di fundacion TEDx Aruba, Elton Arends a comenta cu “semper ta nechi pa ricibi un premio, pero no ta pa esey nos ta haci esaki; nos ta haci esaki paso nos tin un ekipo cu ta traha cu hopi entusiasmo y nos tin un lider cu un vision amplio di unda nos isla mester bay y con pa haci’e sostenibel. Nos ta haci esaki pa hiba Aruba na e siguiente nivel.”

Entrega di e premionan ta tumando luga na diferente ocasion di Union Europeo manera reunion di Parlamento, Comision, conferencianan na Brussels y otro eventonan special, manera e Live Viewing Event cu tabatin na e Comision Europeo pa sigui di cerca e TEDx Aruba.

dsc_2310

Recommended Posts