[pap] Prome Minister Mike Eman “What if… un pregunta fundamental cu no ta facil pa contesta”

TEDx e aña aki tabatin como tema ‘What if…’. Kico lo tabata otro si bo no tabatin cierto oportunidad y reto pa cambia e direccion di bo bida den forma positivo. TEDx, un evento exitoso mundialmente, a bin Aruba door di e vision y maneho di e gobierno actual. Prome Minister Mike Eman, e persona kende a percura pa a trece TEDx Aruba, a habri e evento cu un bes mas un discurso fenomenal.

Eman a conta con tempo e tabata studia el a bishita e graf di President John F. Kennedy y mirando e candela eterno el a haya un momento di ‘what if’. “Con mundo lo tabata si e lider special aki lo a sigui biba cu tur e soñonan y ideanan cu e tabatin pa cambia mundo? Un pregunta fundamental asina no ta wordo contesta facilmente.” Pero tabata manera Creador kier a contesta e pregunta ey p’e pasobra banda di e graf tin un muraya unda tin graba e siguiente teksto ‘Here on earth, God’s work is ours’. ” Tur loke nos haci na mundo aki, tin e mandato di nos Creador: crea un miho sociedad pa habitantenan di mundo.”

Prome Minister a bisa cu si tuma na cuenta e isla chikito cu Aruba ta, no ta otro cu nos mester traha hunto pa yega na metanan comun. Metanan cu por cambia y amplia oportunidadnan pa tur hende por logra yega na e top di nan potencial. “Haciendo esaki nos por bira e luz di speransa pa resto di mundo, e luga di inspiracion y asina cambia curso di historia. Ta p’esey mes cu nos a brasa cu masha entusiasmo e idea pa trece cambio na e isla aki, pasobra cosnan grandi ta sosode si consecuentemente bo ta cambia e destinacion di cosnan cu ta tumando luga.” Eman a referi despues na e siguiente orador Sara Quita Offringa, kende ta bay conta di su momento special den windsurfing. “Ta hopi impresionante con e ta bay cu un tremendo speed riba e olanan grandi. Pero, e momento mas bunita di Sara Quita ta ora e ta cambia cu e direccion di e biento pa bay unda e mester yega. Esaki ta e momentonan mas bunita den bida. Mescos ta e caso tempo cu Pele, kende a traha historia cu su goalnan bunita. Ora cu e bala a yega cerca dje den e direccion robez, su tras y no su dilanti, na e momento ey Pele a benta su curpa abou y a scop e bala di patras den goal.” Eman a splica cu esaki ta loke nos kier haci aki na Aruba, cu mescos tur e otro islanan tin yen di hotel, danki na e bunita beachnan, e clima agradabel y e hendenan cu nan a bira luganan atractivo pa turista. Pero cu Aruba kier ta mas cu solamente hotelnan bunita y luhoso. Nos kier tin barionan unda tin un bon calidad di bida, hospital di 5 strea, casnan di anciano adecua y un sociedad unda bisiñanan ta tira bista pa otro. “Ta e soñonan aki ta bay mas aya di e dinamismo natural di cosnan cu realmente por cambia e direccion di naturalesa”, Eman a bisa.

Eman a splica cu ora su gobierno a tuma mando na 2009, nan tabatin hopi momento di ‘what if’. “Nos a traha hopi plan den e ‘locker room’ durante e añanan prome y a bin cu idea y diseñonan con traha ora drenta gobierno. Pero cosnan hopi bes no ta bay manera bo ta planea. Na 2007/2008 diripiente mundo a cay den otro y na 2009 e refineria na Aruba a dicidi di cera. Tur e plannan cu nos a traha den e ‘locker room’ a bira retonan. Ainda por ehecuta nan? Mundo ta den crisis. Ta na momentonan asina bo ta haya bo mes dilanti e reto pa haci e ‘chalaca’ di Pele y e cambio di direccion cu Sara Quita ta haci.” Eman a bisa cu trahando cu un bon team, cu tabatin e curashi y e gana pa gara e momento y cambia e direccion, a logra traha duro y awe por mira e resultado.

E team di hende cu e gobierno ta traha cu ne tur dia ta haci nan mes e pregunta ‘what if…’ y ta cumpli cu loke nan ta pone nan dilanti. Un aplauso a sigui pa Innovation Team cu a percura pa TEDx ta riba plataforma na Aruba pa mundo mira. “Mi ta desea tur hende un dia inspirativo awe cu hopi contesta riba e pregunta ‘what if…’, Eman a termina bisando. E dia a sigui cu nuebe orador y bunita shownan di canto y baile.

Recommended Posts