[pap] Andrea Sanders ta papia di su vision: ‘Zero Sushi’

Diamars a yega nos isla un otro orador internacional cu ta participando den TEDx Aruba 2016. Andrea Sanders ta fundador y director di ‘Be Zero’ di ciudad mericano di Boulder, Colorado. Den su presentacion e ta bay comparti informacion e cantidad di sushi na mundo y cua ta e maneranan simpel cu nos por adopta pa contribui na baha e cantidad di sushi ey.

E evento cu ta tuma luga diabierna awo 23 di september den Cas di Cultura ta profilando manera un di e encuentronan informativo y inspirativo di mas importante di aña. E ta mustra tambe di ta bay ta un sala totalmente yen, banda di cu tin varios ‘Live Viewing Events’ na paisnan den Caribe, Latinoamerica y Europa.

Saliendo for di e tema principal di e aña aki, esta ‘What If…?’, Sanders ta bay trece dilanti e pregunta di “Kico lo pasa si nos por baha dramaticamente e cantidad di sushi y plastic cu nos comunidad ta genera, sin importa unda nos ta biba? E presentacion di Sanders ta bay enfoca riba maneranan simpel pa cuminsa pusha na un economia circular (zero-waste lifestyle) na luga di e modelo cu nos ta aplica actualmente cu ta produci un cantidad alarmante di sushi.

Aunke Sanders no por a revela mucho detaye di e contenido di su presentacion na su yegada, el a duna un preludio durante e entrevista. “Mi ta bay papia cu tur hende riba con pa traha menos sushi y e maneranan cu nos por haci esey; tambe pakico nos tin tanto sushi na prome luga. Hopi di nos problemanan cu sushedad ta bin dor di e manera con nos ta diseña productonan.”

E entrepreneur y activista ta traha hopi online y a cultiva un comunidad grandi riba media social. Constantemente e ta activo den comunidadnan pa promove e pensamento di ‘zero waste’ y e ta hopi entusiasma di por transmiti e mensahe ey na Aruba tambe. Sanders: “Bin y bishita TEDx Aruba diabierna y bo por tende di un grupo di orador y ami papiando riba con nos por haci menos sushi.”

E contexto di e topiconan aki lo enfoca riba e isla di Aruba, pa asina e ehempelnan duna por aplica directamente riba esnan cu ta scuchando e presentacion. Mientras cu e transicion pa un vision di cero sushi por mustra como un reto grandi na prome instante, e cambionan cu individuonan por haci den nan bida diario ta hopi simpel y lo hiba na un medio ambiente mas saludabel, mas consenshi personal y un sinti mas grandi di comunidad.

Recommended Posts