[pap] Diversidad di tema y conexion for di oradornan den TEDx Aruba 2016

TEDx 2016 a trata un diversidad interesante di tema e aña aki. Cada orador a profundisa riba temanan manera liderazgo, sobrevivencia y construccion sostenibel. Pa aporta mas ainda na e diversidad, un ta bin di Zuid Africa, e otro di Caribe y e ultimo for di Merca. Sin embargo, cada un a sa di conecta perfectamente cu e publico y trece un mensahe dilanti cu un y tur por a identifica cu ne, di un manera of otro.

Basa riba e tema di ‘What If’, e profesor Sur Africano di universidad hulandes Nyenrode, Christo Nel, a papia riba con Ansha, Poder y Amor ta hunga un rol den nos desempeño como individual, grupo y organisacion. “Bo por odia loke nan ta para p’e, pero bo no por odio nan! Ta solamente pa medio di amor cu bo por trece cambio,” asina Christo Nel a bisa.

Andy Kirchner di un manera hopi sincero y directo a sa di trece dilanti su storia di tragedia personal, pero cu el a comberti den un catalisado pa descubri un forsa interno y un consenshi mas amplio di nos responsabilidad pa cu mundo y cu otronan. E yiu di Corsou, tabata un di e oradornan cu mas a haci un impacto den e programa, pa su honestidad, forza pa recupera su mes, pero tambe di haci di algo creativo cu a yude den su recuperacion un manera di biba.

Brian Heather a trece su filosofia dilanti di construccion di edificionan cu ta sostenibel no solamente den e aspecto ecologico, pero tambe economico. Di mesun forma Heather a expresa con impresiona e ta pa e vision di Prome Minister Mike Eman y e iniciativanan cu ya ta existi na Aruba of ta den desaroyo. Riba e pregunta di con pa combina sostenibilidad cu e proteccion di herencia cultural, manera ta e caso den e revitalisacion di Oranjestad, el a comenta basicamente cu mester duna oido na e comunidad y loke nan kier haci; un principio cu ya caba Gobierno tin añanan ta aplicando.

Tur esnan cu ta desea di reviva e presentacion di algun of tur e 9 orador di TEDx Aruba 2016, por haci esaki bishitando e YouTube Channel TEDx Aruba. TEDx Aruba ta gradici tur miembro di e ekipo, partner, orador, boluntario y publico cu a haci e evento aki, uno grandi atrobe.

Recommended Posts