[pap] Profesor, empresario y experto den liderazgo Christo Nel a yega Aruba

Un di 9 orador pa diabierna awo den TEDxAruba 2016

Christo Nel ta un di e oradornan di TEDxAruba 2016 cu a yega nos isla diamars pa aclimatisa y tene encuentronan preparativo na caminda pa e evento grandi di diabierna awo, 23 di september den Cas di Cultura. Nel ta un empresario cu ta dirigi su compania di consulting trahando cu organisacionnan, particularmente den e desaroyo di liderazgo. Te cu algun tempo pasa e tabata profesor y director di dos programa di MBA na e Universidad Hulandes Nyenrode. El a investiga kico ta loke ta haci un lider tin resultadonan sostenibel y di gran impacto, y el a identifica tres virtud cu ta loke e ta bay comparti cu e audiencia local e internacional di TEDxAruba 2016.

“E ta un proceso hopi emocionante,” Nel ta bisa. “Mi a traha cu lidernan den organisacion y politica mas di 30 aña y den e transcurso mi a tuma nota cu tin algo cu ta separa e lidernan cu tin un impacto sostenibel y esnan cu no.” E profesor ta splica cu virtualmente tur lider tin un impacto pa un tempo corto, pero pa haci e efecto aki sostenibel ta hopi diferente. Studiando mas di cerca, a saca afo cu e punto central ta tres virtud.

“Lidernan cu tin un impacto halto y sostenibel ta informa pa y ta uza poder, ansha y amor como e lijm cu ta uni nan comportacion y pensamento hunto y esey nan ta trece den e cultura di nan ekipo. Con nan ta traha cu poder, ansha y amor pa crea liderazgo sostenibel di gran impacto,” Nel a splica. Durante su charla na TEDxAruba e lo uza ehempel cu el a topa cune di lidernan hopi bon y tambe esnan cu tabata hopi malo.

Den decada 80 y tambe inicio di decada 90 Christo Nel a traha na su pais di origen, Sur Africa, den e esfuersonan durante e guera civil pa caba cu Apartheid. El a traha cu lidernan comercial, sindical y di gobierno pa trece nan hunto. El a traha hopi di cerca cu algun di e lidernan Anti Apartheid, di cual Nelson Mandela ta esun di mas grandi y conoci. Nel a splica cu tempo cu el a traha cu Mandela e figura historico aki tabata den prison ainda.

E catedratico ta sinti su mes hopi emociona pa e concepto di TEDx Aruba 2016 y ta wak e como un oportunidad cu e comunidad di Aruba no mester perde. “Mi ta kere cu e magia di TEDx ta cu nan ta presentacionnan cortico y no lecturanan largo. E variedad di loke hende ta bay papia di dje y personalmente mi ta hopi entusiasma cu e tema di ‘What If’. Mi ta kere cu nos ta bay tin un variedad grandi di presentacionnan provocativo y cu ta priminti di ta un dia hopi emocionante. Tur hende mester haci un esfuerzo y yega,” Christo Nel a finalisa bisando.

TEDxAruba 2016 ta tuma luga diabierna awo 23 di september den Cas di Cultura cuminsando 9:00 am. Diaranson 21 di september, tin chens pa cera conoci cu oradornan di TEDxAruba 2016 na Cas di Cultura mes di 5:00 pm pa 8:oo pm y por tambe cumpra ticket pa e evento di diabierna. Pa mas informacion y detaye tocante di TEDxAruba 2016, consulta www.tedxaruba.com.

Recommended Posts