[pap] Andy Kirchner a yega di Corsou pa TEDxAruba 2016

E lo papia riba con pa supera adversidad y logra bo soñonan

E ta describi su mes como un ‘creative instigator’ y ademas di ta un comerciante, e ta un persona cu a siña hopi di bida, ora cu el a hera perde esaki. Andy Kirchner ta un di e 10 orador cu ta forma parti di e programa pa TEDxAruba 2016. El a yega diamars merdia for di Corsou y ta hopi entusiasma di comparti su experiencia cu e pueblo di Aruba.

Despues di a haya un accidente basta grave cuater aña pasa den cual el a keda paralisa di su pecho bay abou, Andy a dicidi di no cay venci, pero a lucha pa surpasa e retonan cu el a haya su dilanti. Di su experiencia el a crea un testimonio positivo cu e kier mustra na mundo henter.

“Mi ta bay papia riba ‘life after death’, e ‘what if’, mi ta bay papia riba con adversidad den bida por haci bo mas miho, duna bo mas forsa y pone bo resalta den bida. No solamente sinta yora di kico a pasa bo, pero briya y briya manera un strea grandi,” el a conta na su yegada na aeropuerto. Ricibi pa representante di comision organisado, el a probecha pa haci un invitacion pa atende e actividad di TEDxAruba of sigui esaki pa medio di e live streaming.

Cuater aña pasa, ora cu e tabata limita fisicamente, un di e poco cosnan cu e por haci tabata wak videonan riba YouTube. Un di esnan cu a hala su atencion mas tabata e serie di TED Talks. El a wak nan cu e intencion di desaroya su mes y asina el a haci su mes tambe e promesa di un dia bira un speaker di TEDx su mes. “Cuater aña despues ata mi ta realisando mi soño y riba esey mi TED Talk ta bay ta,” Kirchner a conta.

TEDxAruba 2016 ta tuma luga diabierna awo 23 di september den Cas di Cultura cuminsando 9:00 am. Diaranson 21 di september, tin chens pa cera conoci cu oradornan di TEDxAruba 2016 na Cas di Cultura mes di 5:00 pm pa 8:oo pm y por tambe cumpra ticket pa e evento di diabierna. Pa mas informacion y detaye tocante di TEDxAruba 2016, consulta www.tedxaruba.com.

Recommended Posts