[pap] Socionan internacional ta interesa den kico ta sosodiendo na Aruba riba tereno di sostenibilidad

[article is in Papiamento]

TEDx Aruba 2016 ta expande su red di ‘Live Viewing Events’. E siman aki ta uno di anticipacion cu ta culmina cu e realisacion di e dos edicion di TEDx Aruba riba diabierna 23 di september. E reaccionnan ta indica na e organisadonan cu nan por bay conta, un biaha mas, cu un sala principal di Cas di Cultura completamente. Adicional na e programa cu ta inclui un total di 10 orador, local e internacional, di gran caliber; TEDx Aruba 2016 ta continua y expande su proyeccion internacional pa medio di e ‘Live Viewing Events’. Esther Pezij-Broeksema, Marketing & PR Manager TEDx Aruba a duna di conoce cu, te aworaki, tin un total di 6 ‘Live Viewing Events’ confirma; for di Latinoamerica te Europa, incluyendo tambe e region Caribense.

Un ‘Live Viewing Event’ ta un mini evento di TEDx caminda e organisacion den exterior tin e opcion di wak e transmision en bibo di e programa. Esaki ta sosode pa medio di e organisacion cu canal dedica riba ‘YouTube’. “Nan por ta sinta den un ‘boardroom’ na algun luga na Colombia y nan ta subi nos canal, click riba nos link y sigui nos en bibo for di Cas di Cultura,” asina e Pezij-Broeksema a comenta.

E miembro di e comision organisado a splica cu loke ta sumamente importante di un ‘Live Viewing Event’ ta cu nan ta acerca embahada y consuladonan Hulandes na Latinoamerica, pero tambe Camara di Comercio, Centronan di Innovacion, ‘Impact Hubs’, cual tur ta stakeholders y socionan internacional cu ta interesa den kico ta sosodiendo aki na Aruba riba tereno di sostenibilidad. Di e manera aki nan ta mantene nan mes actualisa y por actua riba oportunidadnan potencial.

Varios ta e organisacionnan cu ya a expresa un boluntad pa organisa un ‘Live Viewing Event’ den nan seno. Di nan banda, ta manda invitacion pa empresario y otro hendenan den nan red of netwerk, manera studiantenan universitario, etc. pa sinta wak e transmision en bibo di TEDx Aruba.

TEDxAruba ta un evento independiente cu licencia di TED. Hunto cu un red di innovadornan y colaboradornan, ta crea un plataforma pa comparti ideanan, solucionnan, creatividad, innovacion y cultura sostenibel, cu e resto di mundo. Pa mas informacion riba registracion pa e programa di diabierna awor, e oradornan y app, por bishita e website: www.tedxaruba.com/register

Recommended Posts